İndiyədək səkkiz dəfə Azərbaycan Kubokunun qalibi olan "Qarabağ" turnirin mütləq rekordunun sahibidir.
XEBERTV.AZ xəbər verir ki, bu barədə statistikanı Peşəkar Futbol Liqasının mətbuat xidməti açıqlayıb.
Azərbaycan Kubokunun 2024/2025 mövsümünün finalında meydana çıxacaq iki komandadan yalnız biri əvvəllər mükafata sahib olub.
Qurban Qurbanovun yetirmələri həm də kubokun son qalibidir. "Qarabağ" ardıcıl 2-ci, ümumilikdə 9-cu dəfə mükafata sahib olmaq, özünün rekordunu yeniləmək əzmindədir.
Tarixində ilk dəfə final həyəcanı yaşayacaq "Sabah" isə birinci titulunu əldə etməyə köklənib. Bakı klubu qalib gəlsə, kubokun sahibi olacaq 10-cu komanda kimi tarixə düşəcək.
Qeyd edək ki, 1992-ci ildən keçirilən yarışda 9 klub qalib adına sahib çıxıb: "Qarabağ", "Neftçi", "Kəpəz", "Xəzər Lənkəran", "Bakı", "Keşlə" (indiki "Şamaxı"), "Qəbələ", "İnşaatçı", "Şəfa".
Oxu.Az
