26 iyun - Azərbaycan Respublikasının Silahlı Qüvvələri günü qeyd olundu
BAKI-XEBERTV.AZ
2021-06-26
26 iyun 2021-ci il tarixdə Göyçay şəhər Heydər Əliyev Mərkəzinin qarşısında Göyçay rayon İcra Hakimiyyətinin, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin Göyçay rayon şöbəsinin birgə təşkilatçılığı ilə Azərbaycan Silahlı Qüvvələr günü münasibətilə tədbir keçirilmişdir.
Tədbirdə Rayon İcra Hakimiyyətinin başçısı, hüquq-mühafizə orqanlarının rəhbərləri, şəhid ailələrinin üzvləri, Vətən müharibəsi iştirakçıları, ictimaiyyət nümayəndələri iştirak edirdilər.
Azərbaycanın Dövlət Himninin səsləndirilməsi ilə başlanan tədbirdə çıxış edən Rayon İcra Hakimiyyətinin başçısı Mehdi Səlimzadə Azərbaycan Silahlı Qüvvələr günü münasibətilə tədbir iştirakçılarını təbrik edərək bildirdi ki, Azərbaycan Respublikası Silahlı Qüvvələrinin yaradılması müstəqil Azərbaycanın dövlət quruculuğunun mühüm nailiyyətlərindən biridir. Ordumuzun yaradılması prosesi əslində ölkəmizin müstəqilliyinin tarixidir. Əsası Azərbaycan Xalq Cümhuriyyəti dövründə qoyulmuş Azərbaycan ordusunun ənənələri müasir dövrdə də qorunub saxlanılır və inkişaf etdirilir. Bu isə ümummilli liderimiz Heydər Əliyevin ciddi səyləri nəticəsində mümkün olmuşdur. Ali Baş Komandan İlham Əliyevin rəhbərliyi altında Silahlı Qüvvələr quruculuğu sahəsində aparılan işlər bu gün də ölkəmizdə mütəşəkkil, qüdrətli ordu yaratmağa imkan vermiş, onun gələcəkdə daha da möhkəmlənməsi üçün əsaslı zəmin yaratmışdır. 44 günlük müharibədə müzəffər ordumuz bütün dünya arenasında necə qüdrətə malik olduğunu sübuta yetirdi.
Sonra Səfərbərlik və Hərbi Xidmətə Çağırış üzrə Dövlət Xidmətinin Göyçay rayon şöbəsinin rəisi Famil Əliyev, rayon ağsaqqalı, şəhid atasi Akif Kərimov, şəhid övladı Zəhra Xəlilli və digər çıxış edənlər də Vətənimizin müdafiəçilərini Silahlı Qüvvələr Günü münasibətilə təbrik edib, Prezident, Ali Baş Komandan İlham Əliyevin qətiyyəti, Azərbaycan ordusunun gücü sayəsində işğal altında olan torpaqlarımızın azad olunmasında qəhrəmanlarımızın göstərdiyi şücaətdən bəhs edilib.
Sonda Azərbaycan Respublikasının Prezidenti tərəfindən “Cəsur döyüşçü” və “Vətən uğrunda” medalı ilə təltif edilmiş şəhid əsgərlə və qazilərin medalları onların ailə üzvlərinə təqdim edilmişdir.
