Ermənilər Abdal- Gülablıda da qaz yandırdılar... - Bu saatlarda isə Bərdə qaza həsrət qalıb
Bəzi sakinlər odun toplayıb ocaq qalayır, köhnə neft sobalarını işə salırlar...



26-cı ildir ki, işğal altında qalan Ağdam rayonunun məşhur Abdal-Gülablı məntəqəsində ermənilər yalnız bu günlərdə qaz xəttini bərpa edə biliblər.

Moderator.az yazır ki, bu haqda Xankəndindəki qondarma separatçı rejimi nəşrləri məlumat yayıb. “Vazgenaşen” adlandırılaraq “Martuni rayonu”na “daxil edilmiş” ərazidə- Abdal kəndindəki 15 erməni evində artıq qaz yanır. Qonşu Gülablı ərazisindəki 10 evə isə bu yaxınlarda qaz xəttinin çəkiləcəyi gözlənilir. Qazın çəkilişini təşkil edən “Artsaxqaz” Aksioner Səhmdar Cəmiyyəti bunun üçün 4 mln. 603 min dram(təxm. 15 min 920 AZN) vəsait xərcləyib.



P.S. Rusiyadan baha qiymətə qaz alan Ermənistan işğal altındakı dağ kəndlərini belə, mümkün qədər təbii yanacaqla təmin etsə də, Azərbaycanın rayonlarında, hətta paytaxt Bakıda qazla bağlı hələ də xeyli problem var. Bir sıra yaşayış məntəqələri hələ də qazla təmin edilməyib, yaxud qaz xətti olsa da, mavi yanacağın təminatı mütəmadi olaraq xəbərdarlıq edilmədən dayandırılıb.



P.P.S. Hazırda Bərdədə olan əməkdaşımızın özünün də şahidliyi ilə yerli sakinlərə istinadla verdiyi məlumata görə, bu saatlarda rayon mərkəzinin xeyli hissəsində, o cümlədən “Qarabağstroy” adlanan geniş ərazisində təbii qazın verilişi heç bir xəbərdarlıq edilmədən dayandırılıb. Artıq 7 saata yaxındır ki, evlərə qaz verilmir. Elektrik plitəsi və ya qaz balonu olmayan sakinlər məcburən 10-15 il öncəki kimi odun-ağac toplayıb ocaq qalayır, yaxud köhnə neft sobalarından istifadə edərək çay, xörək hazırlayırlar. Ümumiyyətlə, son vaxtlar Bərdədə qaz ay ərzində dəfələrlə kəsilir...