Qarabağda yeni kütləvi məzarlıqların aşkar ediləcəyi gözlənilir

Apardığımız təhlillər işğaldan azad edilmiş ərazilərimizdə yeni kütləvi məzarlıqların aşkar ediləcəyini göstərir.

XEBERTV.AZ xəbər verir ki, bunu Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi Qrupunun rəhbəri İsmayıl Axundov “İtkin düşmüş şəxslərin taleyinin aydınlaşdırılması üçün milli və beynəlxalq səylərin artırılması” mövzusunda beynəlxalq konfransda deyib.

O qeyd edib ki, insanların işgəncələrlə öldürülərək kütləvi halda basdırılması və izlərinin itirilməsi, bütün insani dəyərlərə, hamılıqla qəbul edilmiş humanitar normalara hörmətsizlikdir:

“Bu gün burada nüfuzlu və dəyərli insanların, dövlət və ictimai xadimlərin iştirakı ilə keçirilən beynəlxalq tədbirdə biz itkin düşmüş Azərbaycan vətəndaşları, onların basdırıldığı kütləvi məzarlıqlar, həmçinin mina xəritələri barədə məlumatların Azərbaycan tərəfinə təqdim olunmasnı Ermənistan hökumətindən tələb edirik. İtkin düşmüş şəxslər problemi yalnız Azərbaycan üçün deyil, qlobal mahiyyət daşıyan aktual problemdir. Hesab edirik ki, BMT bu sahəyə bir daha diqqət ayırmalı və qurumun itkin düşmüş şəxslər üzrə xüsusi məruzəçisi təyin edilməlidir”.

Axar.az

Göyçay şəhəri Atatürk küçəsində yerləşən 58 Peşə Liseyinin yataqxanasında məskunlaşan şəhid bacısı Quliyeva Nəzakət Əlisəf qızı tərəfindən

ŞİKAYƏT

Mən Quliyeva Nəzakət Əlisəf qızı Göyçay şəhəri Atatürk küçəsində yerləşən 58 Peşə Liseyinin yataqxanasında məskunlaşmışam. Özüm şəhid bacısıyam və eyni zamanda əsgər anasıyam. Yaşadığımız yer olduqca qəzalı vəziyyətdədir. Evin döşəməsi çürüyüb, üst örtüyü isə ümumiyyətlə yoxdur. Nə yayımız var, nə də qışımız. Otağlar ilanlar, əqrəblər və digər zəhərli həşəratlar dolu olur. Dəfələrlə Göyçay Rayon İcra Hakimiyyəti başçısı Natiq Ağayevin qəbulunda olmuşam. Ona yalvarıb-yaxarmışam ki, mənə köməklik edin. Lakin o, "bizim sənə yardım etməyə vəsaitimiz yoxdur. Get kimə şikayət edirsən elə, mən heç kimdən qorxmuram. Lap istəyirsən Prezidentə yaz," - deyir. Bir sözlə, Göyçayda istər şəhid bacısı kimi, istərsə də kasıb vətəndaş olaraq heç kim bizi saya saymır, halımızla maraqlanmır.
Mən mətbuat vasitəsilə ölkə başçısı cənab İlham Əliyevə müraciət edirəm. Cənab Prezident! Sizdən çox xahiş edirəm, bizim başqa bir sığınacağa yerləşdirilməyimiz üçün tapşırıq verəsiniz. Ümid edirəm ki, Sizin sayənizdə Göyçay Rayon İcra Hakimiyyətində bizi də sayacaqlar, insan kimi dəyər verəcəklər.

“Tuğ” Dövlət Tarix-Memarlıq və Təbiət Qoruğunun tərkibinə beş abidə daxil edilib.

XEBERTV.AZ xəbər verir ki, bununla bağlı Baş nazir Əli Əsədov qərar imzalayıb.

Qərarla ölkə əhəmiyyətli memarlıq abidələri olan Alban məbədi (1197-ci il, Tuğ kəndi) və Qırmızı məbəd (1000-ci il, Tuğ kəndi), habelə, yerli əhəmiyyətli memarlıq abidələri - Məbəd (XIII əsr, Tuğ kəndi), Məbəd (1747-ci il, Tuğ kəndi) və Körpü (XVIII əsr,Tuğ kəndinin yaxınlığında) də “Tuğ” Dövlət Tarix-Memarlıq və Təbiət Qoruğunun tərkibinə daxil edilib.

Axar.az

Azərbaycanda bu yol ödənişli olacaq - Qərar

Nazirlər Kabineti “M-1 Bakı-Quba-Rusiya Federasiyası ilə dövlət sərhədi avtomobil yolunun H.Z.Tağıyev qəsəbəsindən başlayaraq tikilən yeni avtomobil yolunun 129 kilometrlik hissəsinin ödənişli yol kimi müəyyən edilməsinə dair tədbirlər haqqında” qərar verib.

XEBERTV.AZ -ın xəbərinə görə, qərara əsasən, Bakı–Quba–Rusiya Federasiyası ilə dövlət sərhədi yeni avtomobil yolunun tikintisi ilə bağlı tədbirlər haqqında” Azərbaycan Respublikası Prezidentinin 2018-ci il 19 fevral tarixli 3692 nömrəli Sərəncamına əsasən H.Z.Tağıyev qəsəbəsindən başlayaraq tikilən yeni 150 kilometrlik avtomobil yolunun 129 kilometr hissəsi ödənişli yol kimi müəyyən edilib.

Avtomobil yolunun ödənişli hissəsinin başlanğıc və son nöqtələri:

- başlanğıc nöqtəsi - M-1 Bakı-Quba-Rusiya Federasiyası ilə dövlət sərhədi avtomobil yolunun 52-ci kilometri;

- son nöqtəsi - M-1 Bakı-Quba-Rusiya Federasiyası ilə dövlət sərhədi avtomobil yolunun R-5 Qusar-Xudat avtomobil yolu ilə kəsişməsi.

Ödənişli avtomobil yolunun uzunluğu - 129 kilometr.

Ödənişli avtomobil yolunun başqa avtomobil yolları ilə kəsişmələri və birləşmələri:

- M-1 Bakı-Quba-Rusiya Federasiyası ilə dövlət sərhədi avtomobil yolunun 75-ci kilometri - Giləzi qəsəbəsi;

- M-1 Bakı-Quba-Rusiya Federasiyası ilə dövlət sərhədi avtomobil yolunun 105-ci kilometri - Siyəzən rayonu;

- R-1 Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 1-ci kilometri - Gəndob qəsəbəsi;

- R-4 Quba-Xaçmaz avtomobil yolunun 19-cu kilometri - Xaçmaz rayonu;

- R-5 Qusar-Xudat yolunun 22-ci kilometri - Xaçmaz rayonu.

Axar.az

BAKI-XEBERTV.AZ

Xocalı soyqırımının qurbanlarına həsr olunan növbəti tədbir keçirilib!

Xocalı soyqırımının şahidi, o məşum gecə həyat yoldaşı Səadət Abbasovanı itirmiş, özü isə girovluq həyatını yaşamış Valeh Hüseynovun təşəbbüsü, "Xocalı Soyqırımını Tanıtma" ictimai birliyinin təşkilatçılığı ilə tədbir keçirildi. Tədbiri "Xocalı Soyqırımını Tanıtma" ictimai birliyinin Binəqədi rayon şöbəsinin sədri Ayna Novruzova açdı. Respublikamızın ərazi bütövlüyünün bərpası uğrunda gedən savaş zamanı şəhid olsnların xatirəsi 1 dəq.lik sükutla yad edildi.

Birliyin sədri Ceyran Əzizova qarşıda dayanan məsələlərdən danışdı. Şəhid ailəsi Tacirə Qaçay qızı Xəlilova, Azərbaycanın Milli Qəhrəmanı, şəhid Ələsgər Novruzovun həyat yoldaşı Şəkibə xanım, soyqırımın şahidi şəhid Ramil Məmmədovun həyat yoldaşı Vəsilə Məmmədova, həmçinin, hər 2 valideynini itirmiş Həmayıl Xəlilova, Mübariz Hacıyev, şəhid Əkbərin həyat yoldaşı Mətanət xanım Xocalı soyqırımı zamanı törədilən erməni vəhşiliyindən danışdılar. Valeh müəllim anım tədbirinin əmisi Zəkara kişinin ailə üzvlərinin və həyat yoldaşı Səadət Abbasovanın xatirəsinə həsr edildiyini qeyd etdi. Əməkdar müəllim Zülfiyyə Vəliyeva, "Aran Media Group" un rəhbəri Şeyda Əzizqızı, jurnalist Atlas Xanlar qızı və başqaları Xocalı soyqırımının qurbanlarının ailə üzvlərinə başsağlığı verdilər.

Şairə Nazlı Yazar Vətənə həsr edilən şeirlərini söylədi.

Tədbir ehsan süfrəsi ətrafında davam etdirildi.

Şamil Sabiroğlu, jurnalist.

Bakı

Kürdəmir rayonunda qeydə alınmış 5,2 maqnitudalı zəlzələ nəticəsində hələlik hər hansı dağıntı və ya xəsarət barədə Fövqəladə Hallar Nazirliyinə məlumat daxil olmayıb.

XEBERTV.AZ xəbər verir k, bu barədə Axar.az-a nazirlikdən bildirilib.

“Zəlzələ nəticəsində hazırkı vaxtadək hər hansı dağıntı və ya xəsarət barədə Fövqəladə Hallar Nazirliyinə məlumat daxil olmayıb”, - qurum diqqətə çatdırıb.

BAKI-XEBERTV.AZ

BBC-nin separatçılara efir verməsi... - Şura

Son vaxtlar BBC telekanalı, o cümlədən bu media qurumunun Azərbaycan xidməti tərəfindən Azərbaycanla Ermənistan arasında münasibətər, Azərbaycanın Qarabağ iqtisadi rayonunda ermənilərin yaşadığı ərazidə mövcud vəziyyətlə bağlı qeyri-obyektiv materiallar yayımlanır və qərəzli iddialar irəli sürülür. Bu materiallarda suveren ərazimiz olan Qarabağ bölgəsindəki erməni separatçıları təbliğ edilir, onların “fəaliyyətlərinin” leqallaşdırılmasına cəhdlər göstərilir. Bütün bunlar Azərbaycan xalqında haqlı narahatlıq və narazılıq, qəzəb və hiddət doğurur.

XEBERTV.AZ xəbər verir ki, bu barədə Azərbaycan Mətbuat Şurasının yaydığı bəyanatda qeyd olunub.

“BBC-nin belə dəst-xətti jurnalistika prinsiplərinə aşkar sayğısızlıqdır, sivil media dəyərlərinə həqarətdir. Azərbaycan cəmiyyəti hesab edir ki, jurnalistika manipulyativ missiya daşımamalı, azad sözün imkanlarından sui-istifadə yolu tutmamalıdır. BBC və onun Azərbaycan xidməti bu tələbə əhəmiyyətsiz yanaşır, Qarabağdakı separatçılardan qalma tör-töküntülərə tribuna verir, onların söylədiklərini böyük canfəşanlıqla yayımlayır, nəticə etibarilə qeyri-obyektiv davranaraq, əsil həqiqətləri arxa plana keçirir.

BBC telekanalının Azərbaycanla Ermənistan arasında sülh prosesinə, Qarabağ erməniləri üçün ərzaq göndərməsi ilə bağlı məsələlərə birtərəfli və əsl həqiqəti təhrif edən münasibəti yolverilməzdir. Bu yanaşma xalqımızın iradəsinə və mövqeyinə kökündən ziddir. Qətiyyətlə bildiririk ki, BBC-nin Qarabağdakı separatçı qüvvələrin təmsilçilərinə efir şansı tanıması, mövcud xüsusda reallığa zidd olan saxta sentimentallıq səhnələrinə yer ayırması dünya ictimaiyyətini çaşdırmaq və onda yanlış rəy formalaşdırmaq cəhdidir.

BBC-nin yolverilməz fəaliyyəti dövlətlərin ərazi bütövlüyünə və suverenliyinə təhdidi adiləşdirir, normaya çevirir, dünyanın müxtəlif bölgələri üçün də son dərəcə təhlükəli presedent yaradır. Bu, sülhə və əminamanlığa, asayişə və firavanlığa yad təmayüldür. Dünyada məşhur, jurnalist etikası sahəsində örnək sayılan media qurumunun avantürist siyasətin alətinə çevrilməsi böyük təəssüf hissi doğurur.

Cəmiyyətimiz, habelə media ictimaiyyətimiz BBC-nin və onun Azərbaycan xidmətinin jurnalist etikasına son dərəcə laqeyd dəst-xəttini, bu dəst-xətdən irəli gələn ayrı-ayrı məqamları pisləyir, belə hallara qarşı tədbirlərin görülməsini zəruri sayır. Mətbuat Şurası ölkəmizin media cameəsinin baxışlarını, ümumən xalqımızın maraq və mənafelərini ifadə edərək, bu qənaətə gəlir ki, BBC-nin müstəqil Azərbaycanın reallıqlarına hazırkı yanaşması arzuolunmazdır. Ya bu media qurumu üzr istəyərək ölkəmizin ərazi bütövlüyünə və suverenliyinə hörmətlə yanaşmağı öyrənməli, səmimi niyyətini əməli fəaliyyəti ilə sübuta yetirməyi bacarmalı, ya da onun Azərbaycan xidmətinin fəaliyyəti dayandırılmalı və akkreditasiyası ləğv olunmalıdır”, - bəyanatda qeyd olunub.

Axar.az