Xəbər lenti
Axtar

Polisə vəsiqə göstərmək qorxusu

24 Ara 2015, 08:04   
    246
Polisə vəsiqə göstərmək qorxusu

O gün Gəncədə "Kəpəz" - "Neftçi" oyununda daş-qalaq olmuşdu axı. Həmkarlarım da öz işlərini görmək üçün foto+videoçəkilişlərdən yararlanırdı. Ancaq polis boyunda akkreditasiya olduğu halda buna imkan vermirdi.

Birisinin boynundan akkreditasiyasını çıxardılar, digərini maşına basıb bölməyə aparmağa çalışdılar. "Kəpəz"in mətbuat xidmətinin rəhbəri Azad​ Mustafayev demişkən, mitinqdəki polislər jurnalistlərin çəkiliş etmək hüquqlarının olduğunu bilir, ancaq stadionlarda oyunların təhlükəsizliyinə cavabdeh olan polislər hələ də jurnalistin belə bir hüquqa malik olduğundan bixəbərdir... Mən də həmin an (söhbət gəncəlilərin daş-qalaq etməsi anından gedir) çəkiliş etməyə cürət etmədim. Çünki elə bir durum yaranmışdı ki, haqlı olduğun halda, zor gücünə səni haqsız çıxaracaqdılar..."sən polisin işinə mane olursan", "dövlət əleyhinə çəkilişlər edirsən" və s. dəxilsiz söhbətlərlə (bu gördüyünüz şəkil də həmin daş-qalaqdan sonrakı proses - "Neftçi" - polis qarşıdurması zamanı çəkilib)...

Çəkiliş etməməyimin başında yaxınlarda yığdığım təcrübə də öz sözünü dedi. Təxminən 2 ayın söhbətidir. "Qarabağ" - "Zirə" oyununun keçirildiyi Əmircan Günəşliyə yaxın olduğundan, həmin matçın ikinci hissəsinə baxmaq üçün adi tamaşaçı qismində ora getmişdim (işlədiyim sayt idman profilli olmadığı üçün).

Ancaq stadionun girişinə ayaq basmaq istəyirdim ki, "İmarət"in bir azarkeşinin qolunu burub PPX maşınına basdılar. "İmarət"in rəhbəri Qabil də orda idi, nə qədər dilə tutmağa çalışdısa, xeyri olmadı.

Mən isə adi tamaşaçı qismində gəlsəm də, yeni iş çıxdığı üçün dərhal telefonu çıxarıb bu anı lentə almağa çalışdım. Stadiona yeni gəldiyimdən, PFL akkreditasiyasını boynuma taxmağa belə vaxt eləməmişdim. Bu an telefonum bir çavuş (başa düş: serjantın) tərəfindən ələ keçirildi. Dərhal vəsiqəmi çıxardım. Onu da əlimdən alıb dedi ki, xeyri yoxdur, gəl gedək rəisin yanına. İri qarınlı kapitanın yanına gətirdilər. Məruzə etdilər ki, bu adam çəkiliş aparırdı. Kapitan vəsiqəyə baxdı və dedi: "Bunu da o azarkeşin yanına qoyub bölməyə basın". Səbəb onların işinə mane olmağımdır. Açığı, həmişə kompromisə gedirdim polisin kobud rəftarı zamanı. Ya oyuna tələsdiyimdən, ya da davaya meyilli olmamağımdan irəli gəlirdi bu güzəştcil olmağım...

Ancaq bu dəfə dəli şeytan beynimə girmişdi elə bil. Dedim, axıra kimi gedim, görüm nolacaq. Ürəyimdə hardasa bölməyə ilk dəfə düşmək kimi axmaq həvəs də oyanmışdı. Ona görə hər vəchlə vəsiqəmi polisdən almağa çalışırdım ki, orda media işçisi olduğumu sübuta yetirə bilim heç olmasa. Çünki qorxurdum ki, məni aparalar, vəsiqəm də o çavuşda qala. Telefonu isə hələ demirəm. 20 dəqiqə idi onun əlində fırlanırdı...

Nə isə... Telefonuma baxdılar. Nə çəkiliş etdiyimi görmək üçün... Sən demə, heç videoçəkiliş etməyə imkan verilməyib mənə. Ona görə ha axtardılar, heç nə tapmadılar. İndi sübut olmadığı üçün məni buraxmalıdılar axı, həm də media işçisinin öz vəzifəsini yerinə yetirməsinə görə bölməyə heç kimi aparmırlar axı..

Kapitan indi bilmir ki, məni necə buraxsın. Arada yalandan ratsiya ilə harasa özündən böyüklərə guya bu barədə məruzə edir. Qayıtdı mənə dedi ki, sən bilirsən, o tutduğumuz adam kim idi?! O, sərxoş idi, stadionun şüşəsini sındırmışdı (doğrudan da polisin onu göstərməsindən sonra şüşənin qırılmasını çəkdim və "İmarət"dən də təsdiqlədilər ki, Nicat adlı azarkeş içkili imiş). Dedim, indi dediniz, indi bildim. Amma bu mənim çəkiliş etmək hüququmu əlimdən almır. Nə isə, ora-bura, söhbət uzandı..

Birdən əhatəmdə yeni gördüyüm çavuşa dedim: "Sən Günəşlidə qalmırsan?" Dedi, qalıram və o da məni tanıdı. Qonşu binada qalır. Elə bu sözümə bənd imiş kapitan. "Bir yerdə qalırsız da. Sən (çavuş) bu adamı (məni) tanıyırsan da? Onda problem yoxdur, gedə bilərsən". Beləcə, kapitan da məni bölməyə aparmaq üçün bəhanə işlətməkdən qurtuldu, mənim isə dəli həvəsim qursağımda qaldı.. Ancaq o vaxtdan dəli həvəsimi oyatmamağa çalışıram..

Səbuhi TOFİQOĞLU

P.S. "Kəpəz"in Müşahidə Şurasının üzvü Mikayil​ Nərimanoğluya dərin təşəkkür düşür, həmkarımızın bölməyə aparılması xəbərini bildikdən dərhal sonra olaya müdaxilə etməsinə görə. Ona görə deyiblər ki, zərin qədrini zərgər bilər. Axı o da AFFA-da mətbuatla əlaqələndirici bir insandır... Yeri gəlmişkən, onun "Neftçi"nin icraçı direktoru Elnur Məmmədova "biz sizdən daha yaxşı klubuq. Bakıda bizim avtobusumuzu daş-qalaq etdilər, sizin isə burnunuz da qanamadı" deməsi gözləmədiyim bir hal idi. O qədər "Kəpəz" də, "Neftçi" də AFFA-dan idarə olunur demişdilər ki...qaynarinfo